Новости

Кошарка

Македонските кошаркари поразени во Приштина од Косово

Македонската кошаркарска репрезентација со пораз ги започна претквалификациите за влез во квалификацискиот циклус за Светското првенство во 2019 година. Македонија во првото коло гостуваше во Приштина и загуби од Косово 72:68.

Македонија катастрофално одигра во првиот дел, одбраната на противникот му дозволи премногу лесни поени, а во нападот целосно шутерски потфрли. Поради тоа Косово по 20 минути игра имаше огромни 40:20.

Многу подобро избраниците на Давитков делуваа во вториот дел, двајцата најдобри (Стојановски и Теодор) влегоа во вистински ритам и предноста на противникот започна да се топи.

Македонија на 27 секунди до крајот дојде до негатива од два поени (72:70), но потоа во последниот напад на Косово Тасовски направи непотребен фаул, го испрати Бекај на линијата за слободни, тој два пати беше прецизен и го постави конечниот резултат.

Теодор со 22 и Стојановски со 17 поени ја предводеа Македонија, додека Бериша уфрли 28 поени и беше најефикасен играч на натпреварот.

Наредниот меч Македонија ќе го одигра в сабота кога во Скопје ќе гостува Естонија.

GOLD
To Top