Новости

Битола инфо

Национални волонтерски награди – златен волонтерски сертификат за 2019

По повод 5-ти декември Меѓународниот ден на волонтерите, Младински културен центар – Битола (Волонтерски центар на Македонија) од 2006 година востанови Национални волонтерски награди. Целта е оддавање на јавно признание на волонтери кои се вклучуваат за доброто на својата заедница, помагаат на други и ја промовираат солидарноста, хуманоста и сите позитивни вредности на волонтерските активности.

Оваа година доделуваме 2 златни сертификати за волонтерство и тоа:

ЗЛАТЕН СЕРТИФИКАТ ЗА ВОЛОНТЕРСТВО ВО 2019 ГОДИНА се доделува на граѓанската иницијатива #НеБидиЃубре.

Преку оваа иницијатива активистите во „Не биди ѓубре“ ја подигаат свеста за почиста околина. Во услови кога се чини дека на никому не му е гајле за животната средина, во Скопје се случува токму спротивното, граѓанската иницијатива покажа на дело дека и тoa како се грижат за околината околу нив. Изминативе две години акцијата ги мобилизира граѓаните самите да го исчистат сметот од улиците и јавниот простор, почна во Скопје и брзо се прошири и во другите градови низ земјава.

,,Не биди ѓубре“ успева да мотивира многу граѓани волонтери, но сепак организаторите очекуваат акција, а не само декларативна поддршка од локалните самоуправи и комуналните претпријатија, бидејќи тоа, во крајна линија е нивна обврска.

Деновиве акцијата оди чекор понатаму, на 14-ти декември над 40.000 вработени во јавната администрација, заедно со граѓанската иницијатива „Не биди ѓубре“ ќе исчистат локации во Скопје и во други градови во земјава. Нека ова биде пример како едно мало јадро на граѓани може да направи и тоа каква промена и воедно да го размрда и населението и институциите.

ЗЛАТЕН СЕРТИФИКАТ ЗА ВОЛОНТЕРСТВО ВО 2019 ГОДИНА се доделува на Ротари клубот Битола Широк Сокак за волонтерската акција „Да засадиме иднина – 50.000 садници за Битола“.

Акцијата која се реализираше во месец ноември успеа да мобилизира над 700 граѓани од Битола, како и претставници од бизнис секторот, локалната самоуправа и локалните јавни претпријатија, невладини организации, училишта, јавни установи и други субјекти.

50.000 садници беа посадени на површина од 30 хектари од неуморните волонтери на локацијата Бел Камен с. Ротино во близина на Битола, со што се даде огромен придонес за обновување на белите дробови на градот и намалување на последиците од аерозагадувањето.

Акцијата продолжува напролет во 2020 година со засадување на нови 50.000 садници.

„Љубовта и одговорноста кон Битола ни беше мотив за реализација на оваа акција“ – велат од Ротари клубот Битола Широк Сокак.

GOLD
To Top