Новости

Битола инфо

(Фото) Во Битола се одржа отворен ден на вежбата „Одлучен удар“

Попладнево во Битола, на плоштадот „Гоце Делчев“ во овој град, а во рамки на активности на воената вежба „Одлучен удар“, се одржа отворен ден за граѓаните, на кој беа прикажани дел од средствата, опремата и вежбовните активности што се изведуваат на оваа воена вежба во Република Северна Македонија.

Воената вежба „Одлучен удар“ е најголемата воена вежба во историјата на нашата земја, со околу 2.700 војници, истакна претседателот и врховен командант на вооружените сили Стево Пендаровски.

-Посебна е честа што американскиот контингент е застапен со околу 40 проценти од учесниците на оваа мултинационална вежба или со над 1.200 американски војници, а тоа покажува дека стратешкото партнерство меѓу Република Северна Македонија и САД трае, успешно е, и е ефикасно. Со помош на САД очекувам до крајот на годината и формално да ја постигнеме нашата стратешка цел зацртана уште во 90-тите години, односно полноправно членство во НАТО алијансата, и во таа смисла можам да информирам дека процесот на ратификација на пристапните протоколи во сите држави членки на НАТО оди со одлично темпо и ние се надеваме дека до 4 декември, до Самитот на НАТО во Лондон и формално да станеме 30 држава членка на НАТО, истакна шефот на државата Пендаровски.

Битолчани, преку директна комуникација со припадниците на армиите имаа можност поблиску да се запознаат со опремата, постапките и процедурите што ги извршуваат учесниците на вежбата.

Вежбата во градот под Пелистер ја следеа и началникот на Генералштабот на Армијата, генерал-потполковник Васко Ѓурчиновски и градоначалничката на Општина Битола, Наташа Петровска која оцени дека во градот се случи голем настан, и јавно се заблагодари што беше овозможено да биде домаќин на претставници на армиите од САД, Литванија, Албанија, Бугарија и Црна Гора.

GOLD
To Top