Новости

Битола инфо

Битола доби место за игра, рекреација и безгрижно детство – Бимилк отвори детско игралиште во градскиот парк

Во прекрасна, радосна и магична атмосфера, денес на крајот на нашето битолско Шеталиште, во присуство на граѓаните на Битола, претставници на локалната самоуправа и голем број гости, Бимилк свечено го отвори Битолското детско игралиште. Со ова, Битола уште еднаш доби место за игра, забава, рекреација и безгрижно детство на младите и следните генерации.

Игралиштето кое е распространето на вкупна површина од 1 400 m2 и располага со 15 реквизити за индивидуални или игри во група, е донацијата од 2.000.000 денари од страна на Битолска млекара за градот кое што компанијата го посветува на децата и нивната здрава и среќна иднина. Имено оваа година првата млекарница во државата го обележува својот голем јубилеј – 70 години работа и производството на млечни производи, а дечињата денес, во еден глас му го честитаа роденденот пренесувајќи ја возбудата низ песна.

„Грижата и активниот однос кон заедницата е наш придонес што произлегува од корпоративната стратегија на Млекара Битола. Како најголема и прва млекара во државата, покрај производи со врвен квалитет преку вакви донации создаваме и трајни вредности со цел да поттикнеме и мотивираме на едукација, на рекреација и сето она што е потребно за децата здраво и среќно да растат. Преку пренесување на вистинските вредности кај децата правиме чекор напред кон подобрување на условите во општеството и животот во целост. Наша традиција во делувањето е да иницираме различни активности кои на најмладите ќе им овозможат поубаво и поздраво воспитување, затоа што сите растеме заедно и треба тоа да го направиме поквалитетно и посреќно“, истакна Полексена Јанкуловска, маркетинг менаџер на Бимилк.

 

Отворањето на детското игралиште беше проследено со многу забава, музика, креативни игри и едукација. Со поддршка од Пакомак за најмладите беа организирани и едукативни работилници на тема екологија преку кои на децата на интересен, креативен и игривен начин им беше претставено рециклирањето и пренамената на отпадот.

Игралиштето е изградено во соработка со Општина Битола и според градоначалникот Коњановски е една од потребите на градот и содржина што недостига.

„Општина Битола, продолжува со реализација на програмскиот концепт кој предвидува создавање нови хортикултурно уредени простори, простори исполнети со детски играчки, спортски реквизити и друга опрема. Покрај активностите кои општината, заедно со јавните претпријатија ги реализира за уредување на новиот парк во Нова Битола на површина од 25.000 метри квадратни, денес, како резултат на соработката на локалната самоуправа со бизнис заедницата, во градскиот парк, имаме ново, соодветно уредено детско игралиште, рекреативно катче, кое покрај што го разубавува овој дел и содржински го оплеменува. Изразувам голема благодарност за оваа донација од Бимилк, им честитам за нивната 70 годишна, успешна работа и им посакувам голем напредок, продолжување на нашата соработка, како и реализација на многу нови заеднички иницијативи“, истакна градоначалникот Коњановски. – „Радоста и среќата на децата, смеата, нивниот џагор и исполнетоста е нашиот мотив. Новите можности за спортско рекреативни активности се нашиот мал придонес на нашето општество, на нашите компании на нашиот град, кон патеките кои треба да ги трасираме за младите за посреќно детство и здрава иднина на сите нив.“ – додаде градоначалникот.

Евротип
SNBROKER
To Top