Новости

Македонија

Денеска е Преподобен Пимен Велики

Според календарот на МПЦ (Јулијанскиот календар) денеска е 27 август. Денеска е Преподобен Пимен Велики.

Преподобен Пимен живее{е во петтиот век. По род беше Египѓанец. Монаштвото го засака уште како дете, па ги посетуваше големите старци и трудољубиво собираше од нив поуки, како што пчелата го собира медот од најубавите цветови. Подоцна се замонаши, а по него се замонашија и неговите двајца браќа. Манастирот на овие тројца браќа, со кои раководеше најстариот од нив авва Анубиј, го имаше следниов типик: ноќта ја поминуваа четири часа во ракоделие, четири часа во спиење и четири часа во псалмодија; од утрото до пладне времето го поминуваа наизменично во работа и молитва; од пладне до вечерната читаа, а потоа го јадеа единствениот оброк за 24 часа, што обично се состоеше од зеље.

Секојдневно се смируваа еден пред друг. Така проживеа преподобниот Пимен до длабока старост и мирно се упокои во Господа.

Според Католичкиот календар денеска е Св. Петар Клавер.

Бил роден во 1580 година во Шпанија. Во 1596 година го посетувал исусовското сеучилиште во Барселона. Во 1616 година станал свештеник и работел со црнците. Тој бил еден од најзначајните социјални работници и апостол на робовите во Колумбија. Им помагал на робовите кои биле измачувани. За него тие рекле: „Петар Клавер може да биде црнец бидејќи ниту еден белец никогаш нема да знае така да ги сака луѓето”. Свети Петар Клавер умрел во 1654 година.

GOLD
To Top