Новости

Македонија

Вакцината против Ковид во Македонија ќе стигне првите месеци од 2021, прво ќе се вакцинира 20 отсто од населението

Македонија ќе ја добие онаа вакцина која прва ќе биде регистрирана и одобрена преку Ковакс механизмот за глобален и рамномерен пристап до безбедни и ефективни вакцини. Реално би било тоа да се случи во првите месеци од 2021 година, вели за „Фокус“, Проф. д-р Александра Грозданова од Фармацевтскиот факултет, УКИМ која е Претседател на Комитетот за имунизација.

И покрај сите отворени и неодговорени прашања за вакцините, Европската комисија веќе резервира 300 милиони дози за граѓаните, земји членки на Европската унија и 100 милиони дози за другите земји од Европа кои не се членки.

-Договорот со Ковакс механизмот кој Република Северна Македонија го потпиша предвидува вкупна количина од 800.000 вакцини, односно по две дози од вакцината за вкупно 400 илјади луѓе. Во првите 20 проценти се предвидува вакцинирање најпрво на ризичните групи како здравствените работници, хронично болните и постарата популација. Потоа секако се планира набавка на дополнителни количини на вакцини и за останата популација, вели Грозданова.

Таа предупредува дека она со што ќе се соочат земјите од светот се логистичките предизивици при достапноста на оваа вакцина имајќи предвид дека до крајот на 2021 година предвидено е дека ќе бидат потребени повеќе од 2 милијарди дози од оваа вакцина што создава огромен финансиски притисок, но и огромен предизвик во однос на производството дистрибуцијата и складирањето.

Дел од овие вакцини бараат и посебни услови на дистрибуција, дел од нив се развиват како вакцини кои треба да се чуваат на минус 80 степени, а дополнителен предизвик е достапноста и апликацијата.

-Предизвикот за ваква брза и масовна вакцинација ќе биде за сите земји, вклучително и за нашата. Ние токму поради тоа веќе започнуваме со анализа на капацитетите со кои располагаме како технички така и хумани, со цел да имаме увид каде и на кој начин ќе треба да се интервенира. Верувам дека со правилна организација ќе успееме да одговориме и благовремено да се подготвиме за оваа сериозна активност, вели Грозданова.

Компанијата „Фајзер“ веќе поднесе апликација за т.н итна постапка за одобрување на вакцината во Управата за храна и лекови (ФДА) во САД, а оваа процедура се очекува да ја искористат и производителите „Модерна“ и „АстраЗенека“ за регистрација во Европската медицинска агенција. Како што вели Грозданова, најавите се дека веќе во декември можно е да ја имаме првата одобрена вакцина за Ковид- 19.

Во Кина веќе почна вакцинацијата на населението со вакцина од кинеската фармацевтска компанија „Синофарм“, а во Русија веќе се обезбедуваат дози од вакцината „Спутинк V“. Во САД се надеваат вакцинацијата да започне кон средината на декември.

GOLD
To Top