Новости

Македонија

Во Крушево одбележан 41. роденден на Тоше Проески, покрената иницијатива 25 јануари да биде национален ден на хуманоста

Со посета на неговото вечно почивалиште, со роденденска торта, со промоции и музичко-сценски настани во спомен-куќата на „Тодор Проески“ денеска во Крушево на Гумење, беше одбележан 41-иот роденден на Тоше Проески.

Среќни поради неговиот роденден, но тажни поради прославата без Тоше, неговите фанови и поддржувачи од земјава и од Балканот го посетија Тошевото гробно место на Гумење.

За Наум Капричевски, маратонец, битно е да се биде со Тоше и на неговиот роденден, а не само на 16 октомври кога го трчаат маратонот во негова чест.

– Го трчаме маратонот од Нова Градишка од Хрватска до Крушево, на Гумење секој 16 октомври кога Тоше загина во сообраќајната несреќа. Но решивме, битно е да сме на неговото вечно почивалиште и на неговиот роденден, на 25 јануари, изјави Капричевски.

Стела Прислан Фујс од Загреб, Хрватска вели дека секој значаен датум е во Крушево, на Гумење, на вечното почивалиште на Тоше Проески. Истакнува дека најтажно е кога се слави роденден на гробно место.

– И денеска за неговиот роденден сме овде, на Гумење. Тоше не е со нас, но ние сме со него. Најтажниот момент е кога мајката на Тоше ја даруваше роденденската торта за синот на неговото гробно место. Тоше е љубов, бескрајна желба и наша икона. Тука сме за неговите и наши спомени. Да се биде денес на Гумење е чест и привилегија, но и тажно. Но, сите знаеме дека Тоше има само ден на раѓање, вели Стела Прислан Фујс од Хрватска.

Повеќето настани за одбележувањето на роденденот на Тоше се одржаа во неговиот Спомен дом на Гумење: традиционалната крводарителска акција, се интерпретираа песните на Тоше, се одржаа промоции на книги, а попладнево е и музичко-сценскиот настан насловен „Ангел си ти“ со настап на камерниот оркестар од Битола и солистите и изведувачи од Македонската опера и балет. Ова е посебно за нас и за сите нови генерации, вели директорката на спомен-куќата „Тодор Проески“, Лефкија Гажоска.

– Спомен-куќата на Тоше е и домот на неговите спомени. И на спомените за Тоше од неговите фанови и почитувачи. Сите настани токму овде ги одржавме во чест на роденденот на Тоше. Тој беше музичар, но и голем хуманитарец. Мило ми е што младите генерации ги почитуваат и усвојуваат неговите морални вредности, вели Гажоска.

За градоначалникот на Крушево Томе Христоски, Тоше беше музичар, но и голем хуман деец. Посочи дека е покрената иницијатива 25 јануари да биде национален ден на хуманоста.

– Решивме дека денот на хуманоста на 25 јануари треба да биде и национален ден на хуманоста. Денеска доделивме пакетчиња во крушевските училишта, ама и поделивме 10 хумаитарни ваучери со еднократна помош за најсиромашните крушевски семејства. Сакаме и оваа година со бројни настани да ги привлечеме фановите на Тоше зашто се навршуваат и 15 години од сообраќајната несреќа кога на 16 октовмри 2007 година кај Нова Градишка, Хрватска, Тоше го загуби животот, вели Христоски.

Годинава се навршуваат 10 години од отворањето на спомен-куќата на „Тодор Проески“ на Гумење во Крушево. Досега дошле околу еден милион посетители.

Евротип
SNBROKER
To Top