Новости

Прилеп инфо

Вечерва по шести пат ќе одекнат песните на „Прилеп фолк-фест 2022“

По пауза од неколку години, вечерва, во салата на културниот дом „Марко Цепенков“ во градот под Марковите кули, ќе се одржи шестото издание на фестивалот на авторска народна музика „Прилеп фолк-фест 2022“, под покровителство на локалната самоуправа.
Организатор на фестивалот е продукцијата „Уан веј“, а уметнички директор е познатиот македонски текстописец Борче Нечовски.

– И оваа година прилепчани ги очекува вечер со квалитетни песни, и тоа отпеани од најзвучните имиња од нашата фолк-сцена. Ни претставува огромно задоволство што повторно се врати овој фестивал, бидејќи тој беше и ќе остане еден од симболите на градот Прилеп. Она што може да го ветиме се квалитетна музика и познати изведувачи докажани на македонската сцена, а се разбира можност да се претстават пред пошироката јавност ќе добијат и неколку нови имиња – велат организаторите.

Ќе настапат дваесетина изведувачи, а наградата за животно дело ќе ѝ биде доделена на Блага Петревска, која надвор од конкуренција ќе ја испее песната „Запеј генерацијо“.

– Имајќи го предвид долгогодишниот недостиг од квалитетна македонска народна музика, на годинешното шесто фестивалско издание на „Прилеп фолк-фест“ ќе понудиме свежи и квалитетни авторски народни песни. Огромна е одговорноста да се организира еден ваков фестивал, но уште поголемо е задоволството што ќе настапат голем дел од најдобрите пејачи и автори, придружувани од врвни музичари, кои оставиле огромен белег во нашата новокомпонирана народна музика. Одржувањето на вакви фестивали, секако, е од голема важност, имајќи предвид дека така се создаваат и нови имиња што ќе ја продолжат традицијата. Особено ме радува што на нашиот повик се одзваа буквално најдобрите и убеден сум дека и љубителите на народниот мелос во Македонија ќе уживаат во новите фестивалски рефрени – вели Борче Нечовски.

Според финалниот распоред, фестивалот ќе го отвори Нино Величковски со песната „Сами се казнивме“, а по него настапува Елена Велевска со песна за својот град – „Мојот Прилеп“. Групата „Фокус“ пее за „Двајца браќа“, Ивана Серафимовска ќе ја слушнеме со „Дуња на Василица“, а Зуица Лазова ќе ја исполни песната „Богородице“. Живе Мешуревски пее „Дури не те оставам“, а Сања Ристевска „Ајде чичо“, додека „Скопски боеми“ порачуваат: „Остајте ги мобилните“. Десетта е Сања Барбика, која пее „Сказалки се љубат“, а Иван Илиев вели „Нека оди бестрага“. Јордан Митев ќе ни открие која е неговата „Пуста желба неостварена“, а за Сани Гроздановска „Адресата е непозната“. Групата „Маестро“ вели „Една наша“, а гостинката од Србија, Драгица Радосављевиќ-Цакана, на македонски ќе ја испее песната „Ти ме правиш совршена“. Наум Петревски пее „Сѐ што имам“, а Татијана Стефановска сака да патува „Некаде на југ“. За Адријана Ацевска „Нема правила“, а Марјан Коцев ќе ни раскаже „Виртуелна приказна“. Последна, 20-та, ќе се претстави Сузана Гавазова со песната „Тетовирано“.
Дваесетте фестивалски учесници ќе ги отпеат песните на дел од најдобрите македонски автори: Миле Барбаровски, Милан Завков, Николче Мицевски, Дејан Момироски, Борче Нечовски, Горјан Стојановски, Огнен Неделковски, Ѓорѓи Барбаровски…

На Македонската телевизија ќе има директен пренос од фестивалската вечер.

Евротип
SNBROKER
To Top